Hoxe publicouse unha entrevista en vídeo na que falo de como vexo o futuro de Galiza, e en xeral dos países industrializados, no contexto do devalar do petróleo. O vídeo forma parte dunha serie de entrevistas coas que estamos a presentar a Guía para o descenso enerxético, o máis importante proxecto posto en marcha ata o de agora pola Asociación Véspera de Nada, organización da que fun cofundador hai agora xusto 5 anos. Despois de todo este tempo tentando concienciar a sociedade galega acerca do problema do peak oil lanzámonos a preparar un material de tipo práctico que dea unhas orientacións básicas para todas aquelas persoas que queiran irse preparando e axudando a preparar as súas comunidades e o conxunto do país.
Esta obra é fundamental dentro dos obxectivos da nosa asociación, pois xordimos precisamente para alertar o país e para contribuír a preparalo. Despois de moito tempo querendo realizar esta publicación e buscando apoios, por fin este ano verá a luz, se é que a campaña de micromecenado colectivo (crowdfunding) que puxemos en marcha en Verkami chega a bo remate. De momento a resposta da xente está a ser incrible: en apenas unha semana que levamos recollendo fondos, xa estamos preto do 50% do diñeiro que precisamos!
Para min é un honor e unha enorme responsabilidade participar coordinando a Guía e laborando nos seus contidos coa axuda e supervisión de varios compañeiros, de dentro e de fóra de Véspera de Nada. De especial relevancia é a achega á obra de Xoán Doldán, amigo e mestre onde os haxa nesta e en moitas outras cuestións, a referencia sen dúbida de maior relevancia no noso país sobre o problema do teito do petróleo.
Posiblemente este sexa o proxecto máis trascendente dos que teño emprendido xamais, e espero que realmente axude a que centos de familias en todo o país, se cadra ducias de comunidades locais, estean mellor preparadas e polo tanto sufran menos coa trasformación histórica que imos sufrir e poidan mudar a súa vida conscientemente e para mellor. Non nos cansamos de repetilo, tanto nós como outros estudosos e activistas da cuestión: sen preparación anticipada, o descenso enerxético será caótico e significará enorme sufrimento para a inmensa maioría da poboación, non só de Galiza senón de todo o mundo civilizado. Por iso cando me suxeriu o realizador do vídeo que tamén participase nesta serie de entrevistas non me puiden negar, aínda que non tiña intención de protagonizar ningún dos vídeos previstos e prefería ceder a voz e a presenza ás compañeiras e compañeiros da asociación para que achegasen outros puntos de vista, outras experiencias… E ao final resultou que o meu vídeo foi o primeiro en estar listo para publicación. Espero que polo menos serva para chegarmos a máis xente e que aínda algunha familia máis —ou empresa, concello, aldea…— poida estar máis preparada para o que temos por diante grazas a que veu este vídeo, escoitou o que tiñamos que dicir, e fixo posible que a Guía para o descenso enerxético chegara ás súas mans a tempo para abordar as mudanzas que tarde ou cedo todos imos ter que facer. No feito de facelas consciente e anticipadamente estará a diferenza no resultado, e a diferenza entre unha Galiza que resista o colapso e renaza próspera e un país que sucumba ás peores consecuencias debido a unha total ignorancia do problema de fondo e que teime en continuar cun sistema xa inviable.
