Corda: máis unha posible palabra céltica conservada na nosa lingua

Consultando o glosario da lingua protocéltica da Universidade de Gales sorprendeume atopar a palabra *korda co significado de grupo de persoas, familia. Inmediatamente veume á cabeza a expresión ser da corda de: «Este neno só xoga cos que son da súa corda», «Non me dá moito que falar, non é da miña corda», etc. Se pensamos no significado que habitualmente se lle dá na nosa lingua á palabra corda, non ten moito sentido esa frase, máis se pensamos que proceda desa antiga palabra das linguas célticas, ten un sentido absoluto e diáfano: estaríamos directamente dicindo que non é da nosa familia ou da nosa tribu. Se está hipótese fose acertada, mesmo penso que comprería abrir unha segunda entrada diferenciada no dicionario para a palabra corda con este significado, e cunha etimoloxía diferente da que hoxe consta tanto nos de galego como nos de portugués e castelán, do latín chorda á súa vez do grego χορδή (khordê) que significaba intestino, tripa.

1 Comment

casdeiro dice:

2013/08/06 a las 5:56 pm

Coméntame ao respecto da miña hipótese o lingüista Higino Martíns o seguinte:

Quanto ao achado da palavra KORDA, penso que há certa confusão no significado. (…) a etimologia de Córdova, que contém KORDOS ou KORDA. O significado é «rebanho, gado», conjunto sim, mas de animais. Os paralelos germânicos são inequívocos.

Agradezo a precisión léxica, mais coido que non se afasta do principal da hipótese. Ser do meu rabaño é un equivalente perfecto de ser da miña familia, se cadra cunha certa retranca céltica ou se cadra é que naqueles tempos entre familia e rabaño tampouco se distinguía tanto, afeitos como estaban os nosos antergos a se consideraren parte do medio, do mundo natural e por tanto, animal. Ou se cadra a expresión se usaba inicialmente para se referir a outros (El non é da miña corda = El non é do meu rabaño = Non é dos meus).