//

O periódico A Nosa Terra únese ao negacionismo climático?

Lin con noxo o seguinte no último editorial (31 de Decembro) do periódico A Nosa Terra, tras una columna adicada a deitar a dúbida sobre a actuación do goberno español á hora de adquirir doses do antigripal Tamiflu:

Quizais non sexa demasiado conspirativo supoñer que estamos a falar dunha subvención pública encuberta dirixida a empresa(s) químico farmaceúticas.

Esa estratexia podería ser igualmente aplicada ao debate sobre o cambio climático. A súa presentación alarmista parece influída por empresas que agardan realizar un bo negocio na chamada industria ecolóxica. A falta de transparencia sobre este obxectivo permítelles manexar os calendario e tomar unha mellor posición no mercado.

Debo recoñecer que xamais pensei ler algo tan delirante como editorial deste histórico medio. Delirante polo que dá a entender: ¿Seica o goberno español presenta dunha maneira alarmista a mudanza climática? Entón que dirán os responsables de A Nosa Terra dos colectivos ecoloxistas ou dos grupos de científicos que o presentan aínda peor?!

É unha verdadeira mágoa pero non podo interpretar doutra maneira este editorial: A Nosa Terra nega a gravidade da mudanza climática, non sabemos baseándose en que datos, e o que é peor, deita a sospeita talvez dunha confabulación gobernativa-ecoloxista-industrial que tentaría convencernos de que o problema é grave, cando en realidade, para A Nosa Terra, non sería para tanto.

Outro medio de comunicación que deberei renunciar a mercar, xa que logo.

2 Comments

  1. A gripe A e o cambio climático no mesmo saco, e tira para diante. Será por iso de que a climatoloxía afecta á nosa saúde e algúns somos propensos a pillar no inverno a gripe (a de sempre). Descubre A Nosa Terra que as grandes compañías fan negocios, grande descubrimento este, por certo. As compañías farmacéuticas fan negocios coa saúde; as enerxéticas coa venda e distribución de enerxía; as alimentarias cos alimentos necesarios e cos supérfluos, mesmo cos alimentos que non alimentan; as automobilísticas coa venda de automóbeis; ou as mediáticas coa información e o entretemento. Nada novo. E para faceren negocios usan (e abusan) das súas armas: a propaganda, a manipulación, a mentira…ou para sermos máis finos o márketing e o merchandising. E iso significa facer pasar por saudábel o que (cando menos) non o é, ou mesmo é nocivo. Pasar por limpo o que (cando menos) non o é, ou mesmo é polucionante. Pasar por nutritivo o que (cando menos) non o é, ou mesmo é o contrario. Pasar por sustentábel o que (cando menos) non o é, ou mesmo é insustentábel. Pasar por certo o que (cando menos) non o é, ou mesmo é falso.
    A mellor forma de xogar a este xogo é facelo co significado das palabras, cambiar, for levemente, o seu sentido, para confundir, para parecer que dicimos e non dicilo, que facemos e non facemos. Xogar ao equívoco de misturar allos con bugallos, gripes A con cambio climático, tamiflús con CO2, farmacéuticas con accións contra o cambio climático. A sospeita ponse sobre a mesa, non afirmamos pero afirmamos, non dicimos que sexa pero semella que é.
    Non hai dúbida de que hai, e haberá, empresas que tiren proveito do cambio climático, das accións contra o cambio climático, e de non facer nada contra o cambio climático, da súa afirmación e da súa negación: «les affaires sont les affaires». Ese non é problema (séndoo). Ou acaso achamos que nunha economía capitalista as grandes compañías van deixar de facer negocios polo ben da humanidade?. Caeu nesa inxenuidade A Nosa Terra?. Acho que non.
    O problema d’A Nosa Terra é que opta polas teses da negación do cambio climático, mais dunha forma cativa ao non afirmar a súa posición ás claras senón mediante unha acusación de sospeita da «existencia de negocios».
    Mais supoñamos que as teses negacionistas estivesen no certo. Cal é o problema de, por precaución, encamiñar a nosa sociedade cara actividades e actitudes menos polucionantes? Que alguén vai facer negocios? Se este é o problema, defende A Nosa Terra a eliminación de toda actividade lucrativa?.
    Agora supoñamos que as teses negacionistas erran. Esta A Nosa Terra disposta a defender abertamente que o cambio climático non se vai a dar? En base a qué? A que algunhas empresas fan negocios?. Defende A Nosa Terra manter prácticas que xeren gases de efecto invernadoiro? Sabe A Nosa Terra que é o cambio climático, ou só viu a reportaxe de Al Gore?. Que dificil é para algúns superar as teses do progreso continuado baseado no crecemento económico!.
    Vai ser que realmente «os negocios son os negocios». Tamén os da súa empresa (mágoa!).

  2. … ou se cadra todo é moito máis sinxelo. Lembrades que determinados sectores nacionalistas xa puxeran reaccionaran cando se abriu a posibilidade de que As Pontes diminuira a súa emisión de CO2? claro, había postos de traballadores do CO2 ameazados e iso está por diante de todo…

Deja una respuesta

Your email address will not be published.

Este sitio usa Akismet para reducir el spam. Aprende cómo se procesan los datos de tus comentarios.

Lo último de En galego