Partires & pesares

O único lamentable do Castañazo Rock celebrado esta fin de semana en Chantada foi a adscrición dos responsables dos textos promocionais ao grupo de galego-falantes que empregan as construcións absurdas pero moi exitosas de a pesares de e a partires. E é que resulta imposible escoitar un día a TVG ou a Radio Galega sen que saia alguén usándoas, mesmo xornalistas profesionais ou galegos supostamente cultos. O curioso é que a xente que emprega eses supostos infinitivos persoais (fenómeno único nas linguas romances) nesas expresións incorrectas, nunca o usa cando é de usar. Semella algo estraño que se manteña un fenómeno tan fermoso e característico do galego, pero que se manteña nunhas expresións nas que non é correcto usalo. Triste pero revelador da situación da nosa lingua 🙁