Carta aberta aos políticos galegos (sobre a crise do petróleo)

(Baseada nunha tradución propia da carta modelo proposta polos promotores do Oil Depletion Protocol. Cuarta versión revisada.)

Estimado/a representente político/a dos cidadáns galegos:

O motivo desta carta é a miña preocupación acerca da nosa dependencia sistémica con respecto ao petróleo e os seus produtos derivados, e como o próximo declinar da produción mundial de petróleo vai afectar a todos os aspectos da vida galega, desde o trasporte á agricultura ou á tecnoloxía. Tamén quero urxir o apoio dos partidos políticos galegos á adopción, entroutras medidas, do Protocolo de Esgotamento do Petróleo, que está deseñado para mitigarmos estes efectos.

Durante o pasado século, as nacións industrializadas como na que vivimos, acadaron a prosperidade económica debido maiormente ao petróleo doadamente accesible e barato; de feito, o xeito moderno de vida industrial baséase en termos un suministro sostido e abundante de petróleo barato… que non é unha fonte renovable de enerxía. Xa que logo, temos desenvolto unha dependencia insostible con respecto ao petróleo e aos seus derivados, e así é que chegamos a un punto na Historia no que a nosa supervivencia está ameazada precisamente pola mesma materia que nos permitiu chegar até aquí. Cada día máis organizacións internacionais (comezando pola Axencia Internacional da Enerxía) e representantes políticos recoñecen a gravidade da situación e o reto histórico ao que se enfronta a Humanidade.

A era do petróleo barato e abondoso chegou á súa fin. O Cénit do Petróleo está no horizonte inmediato, e se non é que o temos xa aquí, pode que sexa en cousa de 2 ou 4 anos. Os expertos en todo o mundo teiman na importancia dunha preparación temperá e sostida, apuntando ao feito de que na actualidade non existe ningunha fonte de enerxía dispoñible que poida substituir completamente o petróleo. É agora o tempo de considerarmos seriamente as nosas opcións e tomar accións axeitadas para nos prepararmos para un mundo de enerxía reducida.

Por estas razóns urxo aos partidos políticos galegos a:

1. presentaren e aprobaren unha moción no Parlamento Galego na liña da que ven de aprobar o Parlamento Escocés, chamando a ter en conta o Cénit do Petróleo á hora de planificar a economía alimentar galega;
2. crearen un comité especial para o estudo da dependencia do noso país do petróleo e como nos imos ver afectados nun panorama de medre permanente dos prezos deste recurso, do xeito que outros gobernos teñen creado. O obxectivo deste comité (parlamentar ou gobernativo) debe ser o establecemento dunha Estratexia para a redución da dependencia galega do petróleo, como por exemplo ten feito o Goberno do Estado de Queensland, en Australia;
3. asinaren e adoptaren o Protocolo de Esgotamento do Petróleo, un acordo internacional polo cal as nacións do mundo acorden reducir a súa dependencia do petróleo a unha taxa do 2,8% anual (reducir as importacións de cru de acordo coa Taxa Mundial de Esgotamento). Segundo se achegue o Cénit do Petróleo, a redución da nosa dependencia do mesmo non será xa unha opción: verémonos forzados, esteamos preparados ou non. Polo tanto, é absolutamente esencial que comecemos a liberarnos rapida e gradualmente do petróleo. O Protocolo hanos permitir precisamente iso. Se o mundo enteiro o adoptar, o consumo mundial de petróleo minguará gradualmente e dun xeito predicible, estabilizando así os prezos, preservando a base do recurso, e reducindo a máis que probable competición salvaxe polos recursos remanentes.
4. poñeren en marcha medidas lexislativas específicas, como xa ten feito en 2007 o goberno estadounidense coa súa Lei de Seguridade e Independencia Enerxética, que segundo recoñeceu o embaixador dese país en Suecia, foi en parte motivada polo recoñecemento do presidente Bush do Cénit do Petróleo. Outros países como Suíza ou Dinamarca tamén están actuando sobre a cuestión.
5. informaren e concienciaren á sociedade acerca do fenómeno do Cénit do Petróleo e das consecuencias que a nivel social, económico e individual vai supoñer, e como prepararnos como sociedade para afrontalo.

Anímoos a visitar o web do Protocolo de Esgotamento do Petróleo para máis información sobre como actúa e como os gobernos e cidadáns do mundo o poden adoptar.

Anímoos tamén a ser poñer en contacto co Parlamento Escocés (nomeadamente co partido nacionalista no goberno e mais cos Scottish Greens), co goberno do estado australiano de Queensland, co goberno suízo (ref. Michael Kaufman) o islandés e mais o cubano, co comité especial de senadores estadounidenses (ref. Roscoe Bartlett), co primeiro ministro birtánico Gordon Brown, e cos concellos que fan parte da rede mundial de Cidades en Transición, para solicitarlles toda a información que precisen sobre os estudos de que eles dispoñen, e sobre as medidas que están a adoptar nos seus países.

Confío na súa responsabilidade neste tema e que tomen medidas o antes posible, e en calquera caso antes da disolución do parlamento con motivo das vindeiras eleccións autonómicas galegas do 2009.

En calquera caso, espero de vostedes que tamén incorporen esta cuestión aos seus programas electorais para que nesa data poida eu depositar a miña confianza e o meu voto na opción electoral que representan.

Grazas.